പ്രണയ സൂര്യൻ - 3.... ഇന്ദിരാ ബാലൻ
ബോധത്തിൻ്റേയും
അബോധത്തിൻ്റേയും
സ്വപ്ന സഞ്ചാരങ്ങൾക്കിടയിലാണ്
പ്രണയസൂര്യൻ
എന്നിൽ ചേക്കേറിയത്
ചുറ്റും
അവ്യക്തതയുടെ
മേഘമാലകൾ
മേഘങ്ങൾ
പടം പൊഴിച്ച് ഇഴഞ്ഞു നീങ്ങി
തൂവിപ്പോയ വർണ്ണങ്ങളെങ്കിലും
ചില്ലുകളിൽ പതിഞ്ഞ
ജലകണങ്ങൾ
മഴവില്ലുകളായി
പ്രതിഫലിച്ചു
അബോധത്തിൻ്റെ
താഴ് വാരങ്ങളിൽ നിന്നും
ബോധത്തിൻ്റെ
സമതലങ്ങളിലെത്തിയപ്പോൾ
അതൊരു സ്വപ്നം
മാത്രമായവശേഷിച്ചു
ഉച്ചവെയിലിന് മുന്നെ
ഒരു സ്വരം പല്ലവിയായി
പടി കടന്നെത്തി
ജീവിതത്തിൻ്റെ
തിടമ്പേറ്റി
വർത്തമാനത്തിൻ്റെ ഉഷ്ണവെയിലിൽ
ആ സ്വപ്നത്തേരിലാണ്
ഇപ്പോൾ ഞാനും സഞ്ചരിക്കുന്നത്
No comments:
Post a Comment