പ്രണയ സൂര്യൻ - 15
തെളിഞ്ഞു കത്തിയിരുന്ന
നിലവിളക്ക്
എന്നാണതിൽ ക്ലാവ് പിടിക്കാൻ തുടങ്ങിയത്
നടന്നു വന്ന നാട്ടുവഴിയുടെ
മണം അന്യമായപ്പോൾ
നഗര സംസ്കാരത്തിൻ്റെ
ധാടികൾ മടുപ്പിച്ചപ്പോൾ
നിലവറയിൽ മൂകയായി
ആ നിലവിളക്കിലെ
ഒറ്റത്തിരി കത്തി നിന്നു
ധ്യാന പൂർണ്ണമായ
മനസ്സോടെ
ഇപ്പോൾ ക്ലാവ് നീങ്ങിയ
സ്വർണ്ണ നിറമാണ്
ആ വിളക്കിന്
അവളിലെ ക്ലാവ് പിടിച്ച മൗനത്തെ
പ്രണയ സൂര്യൻ
തൻ്റെ കരങ്ങളാൽ
തേച്ചുമിനുക്കിയിരിക്കുന്നു
പുതിയ ഉടലിൽ
അവൾ ശോഭ കൈവരിച്ചിരിക്കുന്നു
ഒരേ തരംഗങ്ങൾ
കൂടിച്ചേരുമ്പോൾ
ഏത് മങ്ങലും
ശോഭയായി പരിണമിച്ചേക്കാം ....!
No comments:
Post a Comment