Social Icons

Tuesday, February 14, 2017

ചുരുളഴിയാത്ത ഭൂപടം


പ്രണയം അങ്ങിനെയാണു
ചിലപ്പോൾ ഓട്ടിൻപുറത്തു നിന്നും
ഭൂമിയുടെ ചുട്ടുപഴുത്ത
പ്രതലത്തിലേക്ക്‌ ഇറ്റുവീഴുന്ന
നനുത്ത മഴയുടെ
പതിഞ്ഞ സംഗീതം പോലെ
മറ്റു ചിലപ്പോൾ തീക്ഷ്ണമായ മടുപ്പിന്റെ
ചുട്ടുപൊള്ളിക്കുന്ന മീനസൂര്യനെപ്പോലെ
വേറെ ചിലപ്പോൾ നിർവ്വികാരതയുടെ
തണുത്തുറഞ്ഞ മഞ്ഞുപാളികളായി
ചിലപ്പോൾ മണ്ണിന്റെ അറിയാമിടങ്ങളിൽ
പമ്മികിടക്കുന്ന കള്ളിമുള്ളുകളെപ്പോലെ
ചില സമയത്ത്‌ ഇരുൾപടർപ്പുകളും
മുൾപ്പടർപ്പുകളും
തിങ്ങി മൗനമുദ്രിതമായ
ഇടവഴികളിലെ സഞ്ചാരിയെപ്പോലെ
പലപ്പോഴും കടലാണെന്നറിഞ്ഞിട്ടും
ഒഴിഞ്ഞുമാറിനടക്കുന്ന അവധൂതനെപ്പോൽ
സമശീതോഷ്ണമായ ഒരവസ്ഥ പ്രണയത്തിനില്ല
അത്‌ അങ്ങിനെയാണു
ചുരുളഴിക്കാൻ കഴിയാത്ത ഭൂപടം പോലെ

No comments:

 
Blogger Templates